Imprimir

O BNG presentará mocións nos tres concellos miñoranos para que insten á Mancomunidade a abordar a situación do G.E.S. Val Miñor

bnggondomar | 21 de Outubro de 2017

Protesta do GES diante do concello de Gondomar
Protesta do GES diante do concello de Gondomar

Ante a situación de precariedade na que está instalado o Servizo de Emerxencias da Mancomunidade do Val Miñor, que acabou provocando as mobilizacións que están a desenvolver os seus membros durante todo este mes, o BNG rexistrará mocións en Nigrán, Gondomar e Baiona, co obxectivo de tentar que os concellos reclamen ao organismo supramunicipal a convocatoria da Comisión creada ao efecto no seu seo, coa fin de acometer seriamente a definición e reorganización completa do servizo, afondando no seu carácter de servizo básico.

Con esta iniciativa, pretendemos dar forma a unha petición xa realizada por nós dun xeito informal ao remate da reunión da comisión da piscina de A Ramallosa, e que foi recibida con innumerables pegas por parte de representantes de PP e PSOE. Buscamos que o asunto se debata e que dea lugar a posicionamentos claros e públicos, evitando que as dificultades alegadas en xuntanzas internas desaparezan cando os traballadores están diante.

Queremos sinalar que esta estruturación dun servizo fundamental como o de emerxencias, debe ser distinta, e en todo caso complementaria, da simple negociación sindical cos traballadores, para abranguer a ordenación das emerxencias nunha comarca, a do Val Miñor, que con case 44.000 habitantes censados e unha poboación na época estival superior aos 100.000, precisa dun servizo público de emerxencias con base no val, ben dotado e con capacidade de resposta.

Para iso temos que esixir de Xunta e Deputación que asuman a súa responsabilidade no financiamento suficiente dunha competencia que ten atribuída, pero non por iso no BNG estamos dispostos a que, mesmo ante a insatisfactoria achega que por parte doutras administracións se puidese dar, renunciar a un servizo digno e, pese as carencias, moi ben valorado polos veciños.

Dende logo será un obxectivo básico da nosa organización o establecemento dunha estrutura estable que remate, entre outras cousas, coas temerarias quendas dun só bombeiro.  

Neste enlace podedes ver a moción que presentaremos no Concello de Gondomar. https://goo.gl/HqmgdZ

BNG.

Podes ver este artigo na próxima dirección /articulo/val-minhor/bng-presentara-mocions-nos-concellos-minoranos-insten-mancomunidade-abordar-situacion-do-gs-val-minor/20171021113638001130.html


© 2018 Bloque Nacionalista Galego de Gondomar

Bloque Nacionalista Galego

Avda. Rodríguez de Viguri, 16 baixo
15703 Santiago de Compostela (GALIZA)
Teléfono: +34981555850
Correo: sedenacional@bng.gal