O BNG, en coherencia coa posición manifestada durante o pleno municipal en que se aprobou –coa abstención do BNG– destinar 400.000€ ás melloras no campo de fútbol, e en protesta polo incumprimento doutros acordos dese mesmo pleno relativos a investimentos en servizos municipais básicos, decidiu non participar do acto de inauguración do novo céspede de As Gaiandas.

No pleno de abril deste ano, ademais do gasto para o novo céspede, foi aprobada unha moción do BNG que instaba a investir os remanentes municipais na atención das necesidades reais de Gondomar. Unha proposta dirixida a incorporar nos orzamentos municipais 1.160.000 €uros, o 42% dos remanentes, para os destinar aos seguintes usos e aplicacións:

• 815.000 €uros para dotar de saneamento e auga a vivendas que carecen destes servizos, sexa de forma directa ou a través de axudas ao baleirado de fosas sépticas, e ás comunidades de auga parroquiais.

• 190.000 €uros para a habilitación do comedor do CRA Antía Cal na antiga casa da mestra en Peitieiros, para o apoio as aulas matinais nos colexios e para melloras nos centros educativos públicos do concello.

• 115.000 €uros para melloras en parques infantís e bio-saudábeis e para a realización de accións de apoio e impulso ao pequeno comercio e de proximidade.

• 40.000 €uros para diversa programación cultural.

Hoxe, transcorridos nove meses daquel pleno, inaugurouse o cespede da Gaiandas. Dos outros compromisos, absolutamente nada, malia seren necesidades prioritarias para a veciñanza.

É por iso que, en coherencia coa nosa postura daquela, xustificamos a nosa ausencia hoxe. Porque, lonxe de cuestionar as melloras en equipamentos deportivos nin de calquera outra caste, a política do BNG é a de priorizar o imprescindible sobre o mellorable, o necesario sobre o accesorio. E é aí onde enfrontamos a nosa acción política coa do actual goberno municipal, máis preocupado polos dividendos electorais das súas decisións que polo benestar do conxunto da veciñanza.

Manténdonos nesa posición publicamente coñecida, desde o BNG de Gondomar parabenizamos ao Club de Fútbol Gondomar polas novas instalacións, que sen dúbida mellorarán o seu rendemento, e trasladámoslles os nosos mellores desexos de éxito, reflectidos en resultados deportivos, medre da canteira e progreso das escolas de fútbol base.