VAL DE MIÑOR, 2 de xuño de 2026.- O deputado do BNG no Parlamento galego, Paulo Ríos, mantivo unha xuntanza cos delegados da CIG membros do Comité de Subus Lugove, para analizar, desde o punto de vista laboral, a situación que atravesa o servizo de transporte prestado por esta empresa no Val de Miñor. O portavoz de mobilidade e transporte do BNG estivo acompañado de Yasmina Moreira, Manuela Rodríguez e Xavier Rodríguez, representantes da organización nacionalista en Baiona, Gondomar e Nigrán, respectivamente.

Na reunión os representantes sindicais trasladaron os incumprimentos reiterados do convenio colectivo de transporte de viaxeiros de Pontevedra, con imposición de xornadas abusivas, descansos insuficientes e outras irregularidades constantes que poñen en risco a súa seguridade e a das persoas usuarias do transporte público.

Ante ese relato, Ríos acusou directamente á Xunta de Galiza de non actuar diante dos reiterados incumprimentos da empresa concesionaria, malia ser coñecedora das constantes denuncias por parte do persoal e das sancións impostas pola Inspección de Traballo. Denunciou, ademais, que esta actitude de "absoluta permisividade e complicidade" por parte do goberno galego “redunda directamente na deterioración das condicións laborais dos traballadores e traballadoras".

O deputado nacionalista lembrou as múltiples dúbidas e procedementos xudiciais que rodearon as licitacións do Plan de Transporte de Galiza, que incluían sospeitas de repartos ilegais de mercado e aceptación de baixas temerarias. Así mesmo, cualificou de "escandaloso" que, tras anos de deficiencias, a Xunta executase o rescate de varias concesións alegando un "mutuo acordo" coas empresas. "A Xunta prefire saídas ‘amigables’ no canto de abrir expedientes por incumprimentos reiterados, ocultando a información das condicións nas que se estaban a desenvolver eses contratos", sinalou.

Durante o encontro, Ríos denunciou con firmeza que os contratos actuais, que foron rescatados pola Xunta de Galiza, acumulan "moitísimos incumprimentos nos últimos anos" sen que o Executivo autonómico tome medidas ao respecto. Segundo explicou o deputado, esta “falta de control e de sancións” por parte da Administración pública inflúe de xeito directo na precariedade que sofre o cadro de persoal.

No caso concreto de LUGOVE no Val de Miñor e o Baixo Miño, desde o BNG subliñaron que a empresa "incumpre absolutamente todo en materia laboral", obrigando aos profesionais a sacar adiante o servizo "poñendo a carga no seu propio lombo". Isto tradúcese nun servizo deficiente e en que, por riba, sexan os propios condutores os que teñan que "dar a cara ante os usuarios por un mal servizo que a Xunta permite".

Para o BNG, a Consellaría de Presidencia e Mobilidade está a facer un "deixamento de funcións manifesto", esquecendo que é a titular do servizo e a máxima autoridade laboral. Sinalan directamente á Xunta de Galiza pola súa "permisividade" e esíxenlle actuar de inmediato e deixar de beneficiar ás empresas concesionarias que incumpren e precarizan.

Nese sentido, Paulo Ríos insistiu en que para mellorar o servizo “a Xunta debe tomar cartas no asunto de xeito urxente, poñerse do lado dos traballadores e traballadoras, esixir á empresa que cumpra estritamente o recollido no contrato en materia laboral e atender de forma inmediata as demandas do persoal", concluíu.