Este venres 25 de maio ás 19:30, na Casa da Cultura de Gondomar, a Plataforma en Defensa da Sanidade Pública do Val Miñor, organiza unha charla-coloquio sobre Que esta a pasar coa Sanidade Pública.

Trátase dun tema de urxente actualidade debido ás modificacións que na sanidade introduce o Real Decreto publicado polo goberno do Estado co obxectivo de reducir a inversión en 7000 millóns de euros. Por esta vía, e coa escusa da crise, o PP vai modificar o modelo sanitario e incrementar o copago, que recaerá xustamente nas persoas que máis precisan da sanidade pública.

Por outro lado, no Val Miñor e, en concreto en Gondomar, existe o problema engadido de estarmos obrigados a acudir ao hospital privado de Povisa, situación que se manterá, malia a construción do novo hospital en Valadares. Este feito xa foi denunciado polo BNG que presentou mocións en todos os concellos da comarca reclamando que a poboación miñorana sexa atendida no novo hospital.

No acto do día 25 en Gondomar, van participar:

- Vicente Lobato Falagan, membro da Plataforma Val Miñor

- María Tato Fontaíña, Xefa Unidade de Atención Primaria de Gondomar

- Xose Mª Sánchez Pena, membro da Plataforma de Cangas

- Manuel Martín García, Portavoz de SOS Sanidade Pública

- Manuel González Moreira, Médico de Atención Primaria, Voceiro da Plataforma de Vigo

Ao rematar as intervencións das persoas convidadas pola Plataforma iniciarase un coloquio.

O BNG de Gondomar, entidade integrante da xestora da Plataforma en Defensa da Sanidade Pública do Val Miñor, fai un chamamento ás veciñas e veciños de Gondomar para que acudan e participen nesta charla-coloquio, tendo coñecemento directo de cales son as modificacións, cales son as súas consecuencias e que podemos facer para combatelas.

O BNG de Gondomar convida a adherirse á Plataforma a todas as persoas e entidades que o desexen, enviando unha mensaxe de adhesión á conta de correo: [email protected]