Gondomar, 02 de agosto de 2024.- O Bloque Nacionalista Galego de Gondomar demanda do goberno local o cumprimento da ordenanza de normalización lingüística. A organización nacionalista denuncia que o goberno non se implica na defensa da lingua galega, algo que como administración pública lle corresponde, tal e como dita a Lei de Normalización Lingüística de 1983 e a propia Ordenanza Municipal de Normalización aprobada en xaneiro de 2020.

Efectivamente, tal e como denuncia o BNG, o Concello de Gondomar leva catro anos incumprindo a súa propia Ordenanza que obriga á creación dun servizo de normalización. Ordenanza que, paradoxalmente, recolle no seu artigo 2.4. “O Concello de Gondomar mantén un Servizo de Normalización Lingüística (SNL) co obxectivo de dar pulo á normalización no concello. Todos os organismos anteriormente citados (concello, organismos del dependentes, empresas) han de se axustar aos criterios de uso lingüístico que difunde o SNL.”

O BNG de Gondomar xa reclamou no seu día a dotación do servizo, así como a constitución e convocatoria das comisións de seguimento da Ordenanza para comprobar o seu cumprimento. Mais, o equipo de goberno desenténdese da nosa lingua. “Non respectan a lingua galega. Aprobouse unha Ordenanza que pretenden facer pasar por papel mollado mentres Gondomar perde falantes”. Para o BNG unha mostra desa falta de respecto é tamén a mala calidade da lingua que empregan nos documentos municipais. “Doen os ollos de ver como a propia web do Concello está inzada de erros que deterioran e desvalorizan a nosa lingua”, denuncia a concelleira do BNG, Manuela Rodríguez Pumar.

“Nin sequera a falta de orzamento pode xustificar este desleixo, porque existen convocatorias tanto da Deputación como da Xunta que permiten facer fronte á creación e posterior mantemento do Servizo”, engade Rodríguez Pumar. “Convocatorias que xusto veñen de resolverse neste mes de xullo e das que Gondomar volveu quedar fóra simplemente porque non se solicitaron”.

O BNG de Gondomar seguirá esixindo a creación do servizo de normalización lingüística. Un servizo imprescindíbel para asesorar a Administración, facer seguimento do cumprimento da lexislación en materia lingüística ou velar para que se garantan os dereitos lingüísticos da cidadanía, ao tempo que planifica, xestiona, executa e avalía accións a prol da lingua galega, fomentando o seu uso en todos os ámbitos para contrarrestar a perda de falantes. Por este motivo emprazan xa ao Alcalde de Gondomar e aos departamentos responsábeis a que elaboren un proxecto para presentar nas vindeiras convocatorias e a non deixar pasar un ano máis sen que se cree este servizo.

Así mesmo, desde o BNG demandan a constitución e convocatoria inmediatas da comisión de seguimento do cumprimento da ordenanza, que debe reunirse cando menos dúas veces ao ano, tal como recolle no seu artigo trinta, e que “aínda non se convocou nin unha soa vez en catro anos”, engade Rodríguez.