Charla do BNG en Borreiros sobre a Lei de Montes e as fumigacións

Charla do BNG en Borreiros sobre a Lei de Montes e as fumigacións

O deputado do BNG no Parlamento galego, Henrique Viéitez, e o presidente da Organización Galega de Montes, Xosé Alfredo Pereira, falarán no Centro Cultural de Borreiros do borrador da Lei de Montes e a proposta de fumigacións das empresas papeleiras


- O BNG realizará este venres 1 de xuño ás 20:30 no Centro Cultural de Borreiros, un acto comarcal do Val Miñor para explicar o borrador da Lei de Montes e a proposta de fumigacións das empresas papeleiras.

No acto intervirán o presidente da Organización Galega de Montes en Man Común, Xosé Alfredo Pereira, e o deputado do BNG no Parlamento galego, Henrique Viéitez.

O BNG explicará que a proposta de borrador presentada pola Consellaría de Medio Rural non recoñece a titularidade comunitaria dos montes veciñais, catalogación recoñecida polo Gabinete xurídico da Consellaría e do Parlamento no seu día. A propiedade comunitaria é un sistema de xestión do monte que se remonta varios séculos atrás, tendo os seus inicios no dereito xermánico. É característica de Galiza e o norte de Portugal, onde está recoñecida na propia Constitución da República.

Ademais o proxecto de lei do PP non dá resposta aos problemas estruturais e aumenta a desprotección fronte aos lumes. O borrador presentado polo goberno non introduce melloras na actual situación de falta de ordenación e proliferación de especies pirófitas. O único obxectivo desta Lei de Montes elaborada polo goberno do PP é o desmantelamento da Lei de Prevención e Defensa contra Incendios Forestais de Galiza promovida polo BNG dende o anterior goberno da Xunta.

Neste sentido o BNG expresará o seu apoio á manifestación convocada pola Organización Galega de Montes en Man Común prevista para o día 9 de xuño.

Canto á proposta de fumigacións das empresas papeleiras, o BNG explicará as consecuencias de medidas tan agresivas coma esta e cales son os requisitos que as empresas deben acreditar. O BNG promoverá entre os comuneiros que non autoricen estas fumigacións nas súas propiedades, polas súas nefastas consecuencias sobre a saúde dos seres vivos. A industria papeleira pretende fumigar moitas zonas do país con Flufenoxuron, un produto tóxico para insectos e ácaros, de degradación lenta e que se acumula en diferentes organismos acuáticos. A Unión Europea, o 9 de febreiro de 2012, ordenou que produtos con ese compoñente deixen de comercializarse a partir do 1 de agosto de 2012, por mor da súa toxicidade e por ser biocaumulábel.





A nova nos medios:

Charla do BNG en Borreiros sobre a Lei de Montes e as fumigacións